第二十四回 只怕招冤同行相护　自甘落魄失路谁悲

按：王莲生躺在榻床右首，吸烟过瘾；复调过左首来，吸上三口，渐觉眉低眼合，像是烟迷。张蕙贞装好一口烟，将枪头凑到嘴边，替莲生把火。莲生摇手不吸。蕙贞轻轻放下烟枪，要坐起来。莲生一手扳住蕙贞胸脯，说：“耐也吃一筒囗。”蕙贞道：“我（要勿）吃；吃上仔瘾，阿好做生意嗄？”莲生道：“陆里会上？小红一径吃，勿曾有痛。”蕙贞道：“小红自然。俚是本事好，生意会做，就吃上仔，也匆要紧。倪要像仔俚也好哉！”莲生道：“耐说小红会做生意，为啥客人也无拨哉嗄？”蕙贞道：“耐怎晓得俚无拨客人？”莲生道：“我看见俚前节堂簿，除脱仔我，就不过几户老客人叫仔二三十个局。”蕙贞道：“做仔耐一户客人，再有二三十个局，也就好哉（口宛）。”莲生道：“耐勿晓得；小红也匆过去，俚开消大，爷娘兄弟有好几个人来浪，才靠俚一干仔做生意。”蕙贞道：“爷娘、兄弟来里小房子里，陆里有几花开消？常恐俚自家个用场忒大仔点。”莲生道：“俚自家倒无啥用场，就不过三日两头去坐坐马车。”蕙贞道：“坐马车也有限得势。”莲生道：“价末啥个用场嗄？”蕙贞道：“倪怎晓得俚？” 莲生便不再问，自取烟盘内所剩两枚烟泡，且烧且吸，移时始尽；于是一手扶住榻床栏杆，抬身坐起。蕙贞知道是要吸水烟，忙也起身，取一支水烟筒，就在榻床边挨着莲生肩膀偎倚而坐，装水烟与莲生吸，莲生吸了两筒，复问道：“耐说小红自家用场大。是啥个用场，耐说说看囗。”蕙贞略怔一怔道：“倪是说说罢哉呀，…